ajiib dhund hai a.ankhon ko sujhta bhi nahin
abhi to din ka varaq Thiik se jala bhi nahin
ye kis hisar men sanson ne kas diya hai mujhe
ye kaisa ghar hai nikalne ka rasta bhi nahin
ye kaisa dukh hai jo rota hai siskiyan le kar
khanDar men kaun hai ru-posh bolta bhi nahin
ajiib dard ka rishta hai ik azaab hai ye
jise bhula diya main ne vo bhulta bhi nahin
mujhe bhi dekh mire hausle bhi dekh zara
mira to koi nahin tu nahin ḳhuda bhi nahin
har ek shab koi palkon ko aa ke siita hai
vo mera kaun hai puchhun to bolta bhi nahin
Leave a Reply