aankh hairan hai ye sad-rangi-e-jalva kya hai
shahr kahta hai abhi aap ne dekha kya hai
kaun aaya hai pai-e-chara-gari dekh to le
aḳhir ai dard-e-jigar tera irada kya hai
chhoḌ gulshan ko kisi rashk-e-chaman-zar ko dekh
zauq-e-nazzara yahan bazm men rakkha kya hai
uf vo a.aza-shikani niind men Duubi ankhen
zikr-e-mai-ḳhana hai kya tishna-e-sahba kya hai
ye bhi tadbir hai tajdid-e-ta.alluq ki ‘shakeb’
puchhiye ja ke vo apne ko samajhta kya hai
Leave a Reply