jhuk gaya pa-e-janan pe sar hi to hai
kho ga.i bijliyon men nazar hi to hai
ye jahan pattharon ka nagar hi to hai
saans lena yahan ik hunar hi to hai
chain se rahne deta nahin ek ja
ye hamara junun-e-safar hi to hai
rahzan hi sahi rah-e-manzil men vo
sochta huun mira ham-safar hi to hai
tum to daman bachate ho ab is tarah
jaise aansu nahin ye sharar hi to hai
chalte rahiye jahan tak mile raushni
zindagi husn ki rahguzar hi to hai
tirgi hi ko ‘nazim’ lagao gale
ye bhi ta.abir-e-ḳhvab-e-sahar hi to hai
Leave a Reply