ab husn-o-ishq ke bhi qisse badal gae hain
manzil thi ek lekin raste badal gae hain
kis par yaqin kiije ye daur matlabi hai
lagta hai ḳhuun ke bhi rishte badal gae hain
ankhen bata rahi hain zahir hai haal dil ka
vo bevafa nahin the kitne badal gae hain
ham jante hain phir bhi pahchanna hai mushkil
kuchh doston ke itne chehre badal gae hain
un ko pata tha shayad ik din lagegi Thokar
achchha hai vaqt se vo pahle badal gae hain
jab se mili hai daulat adab bhuul baiThe
ab bat-chit ke bhi lahje badal gae hain
hai vaqt ka taqaza chup-chap ghar men rahiye
chahat vafa mohabbat jazbe badal gae hain
ma.asumiyat kahin par gum ho gai hai ‘aḳhtar’
lagta hai shahr ja kar bachche badal gae hain
Leave a Reply