Zulfiqar Aadil
saara baagh ulajh jaata hai aisi be-tartibi se
mujh men phailne lag jaati hai ḳhushbu apni marzi se
har manzar ko majma.a men se yuun uTh uTh kar dekhte hain
ho sakta hai shohrat pa len ham apni dilchaspi se
in a.ankhon se do ik aansu Tapke hon to yaad nahin
ham ne apna vaqt guzara har mumkin ḳhamoshi se
barf jami hai manzil manzil raste atish-dan men hain
baiTha raakh kured raha huun main apni baisakhi se
ḳhvabon ke ḳhush-hal parinde sar par yuun manDlate hain
duur se pahchane jaate hain ham apni be-ḳhvabi se
dil se nikale ja sakte hain ḳhauf bhi aur ḳharabe bhi
lekin azal abad ko ‘adil’ kaun nikale basti se
Leave a Reply