jaan nazr-e-shabab ho ke rahi
zindagi kamyab ho ke rahi
meri janib jo uTh ga.i thi kabhi
vo nazar la-javab ho ke rahi
ishq men rah-e-rast bhi aksar
rah-e-pur-pech-o-tab ho ke rahi
ba.ad tauba ke aur bhi saaqi
meri halat ḳharab ho ke rahi
un ki mahfil men be-kasi meri
ba.is-e-inqalab ho ke rahi
fasl-e-gul men maze uḌa.enge
ye tamanna bhi ḳhvab ho ke rahi
dahr men ai ‘aziz’ apni vafa
aap apna javab ho ke rahi
Leave a Reply