Abu Bakr Abbad
palat jaana koi mushkil nahin tha
mira hi vapsi ka dil nahin tha
mata-e-zist la-hasil nahin tha
vale paane ke main qabil nahin tha
vo chhuriyan dhaar jis par ho rahin thiin
mira hi dil tha koi sil nahin tha
khula bab-e-junun jab mujh pe yaaro
mira tab koi mustaqbil nahin tha
mariz-e-ishq hone tak suna hai
adhuri zaat tha kamil nahin tha
mujhe gharqab tha az had zaruri
vagarna ziist ke qabil nahin tha
main pyasa tha magar honton se mahrum
samundar tha magar sahil nahin tha
na do ilzam bhaunre ko ‘ali’ tum
vo hargiz phuul ka qatil nahin tha
Leave a Reply