use ye haq hai ki vo mujh se iḳhtilaf kare
magar vajud ka mere bhi e’tiraf kare
use to apni bhi surat nazar nahin aati
vo apne shisha-e-dil ki to gard saaf kare
kiya jo us ne mire saath na-munasib tha
muaaf kar diya main ne ḳhuda muaaf kare
vo shaḳhs jo kisi masjid men ja nahin sakta
to apne ghar men hi kuchh roz etakaf kare
vo aadmi to nahin hai siyah patthar hai
jo chahta hai ki duniya mira tavaf kare
vo kohkan hai na hai us ke haath men tesha
magar zaban se jab chahe vo shigaf kare
main us ke saare naqa.is use bata dunga
ana ka apne badan se juda ghilaf kare
jise bhi dekhiye patthar uTha.e phirta hai
koi to ho miri vahshat ka e’tiraf kare
main is ki baat ka kaise yaqin karun ‘ejaz’
jo shaḳhs apne usulon se inhiraf kare
Leave a Reply