ai saba nik.hat-e-gesu-e-muambar laana
koi tohfa gul-o-nasrin se ḳhush-tar laana
shabnamistan-e-mohabbat ki hasin rahon se
ḳhunki-e-shabnam-o-nur-e-mah-o-aḳhtar laana
jan-ba-lab hain tire mushtaq sar-e-rah-e-hayat
dam-e-isa-o-mai-e-lal-o-gul-e-tar laana
ishq ho mast-o-ghazal-ḳhvan-o-surahi-bar-dosh
zindagi taza-o-sarshar-o-muattar laana
dar-ḳhur-e-mahfil-o-shayan-e-ḳharabat-e-mughan
atishin mutrib-o-be-bak nava-gar laana
tujh ko andoh-e-asiran-e-qafas ki saugand
arzuon ke hasin phuul khila kar laana
kushtagan-e-sitam-e-daur-e-ḳhizan hain ham log
apne hamrah baharon ka payambar laana
is na.e daur ke sheron men taghazzul kam hai
meri uftad tabi.at ka suḳhnavar laana
Leave a Reply