jis tarah dhuup ka rangat pe asar paḌta hai
nafs ka vaise ibadat pe asar paḌta hai
aise mujh par bhi tire gham ke nishan dikhte hain
jaise mausam ka imarat pe asar paḌta hai
sirf mahaul se fikren nahin badla kartin
doston ka bhi tabi.at pe asar paḌta hai
dushmanon se hi nahin hota hai ḳhatra lahiq
baghiyon se bhi hukumat pe asar paḌta hai
ab samajh aaya sabab mujh ko miri pasti ka
maang ghaTti hai to qimat pe asar paḌta hai
bhuuk neki ki lage ya ki lage duniya ki
bhuuk lagti hai to surat pe asar paḌta hai
rizq rukta hai namazon ke qaza karne se
niyyaten bad hon to barakat pe asar paḌta hai
saaf dikhti hai buḌhape men qaza sach to hai
umr ke saath basirat pe asar paḌta hai
paas rahne se hi baḌhti nahin chahat ‘mohsin’
faslon se bhi mohabbat pe asar paḌta hai
Leave a Reply