di hai vahshat to ye vahshat hi musalsal ho jaae
raqs karte hue atraf men jangal ho jaae
ai mire dasht-mizajo ye miri ankhen hain
in se rumal bhi chhu jaae to badal ho jaae
chalta rahne do miyan silsila dildari ka
ashiqi diin nahin hai ki mukammal ho jaae
halat-e-hijr men jo raqs nahin kar sakta
us ke haq men yahi behtar hai ki pagal ho jaae
mera dil bhi kisi aseb-zada ghar ki tarah
khud-ba-khud khulne lage khud hi muqaffal ho jaae
dubti naav men sab chikh rahe hain ‘tabish’
aur mujhe fikr ghazal meri mukammal ho jaae
Leave a Reply