Dr Azam
jhurriyon ki qatar dekho to
umr se apni haar dekho to
huuk be-iḳhtiyar uThti hai
apne jab iḳhtiyar dekho to
jhiil kahte ho tum jin ankhon ko
un men hain abshar dekho to
jaane kya kya nazar vo aata hai
jab use baar baar dekho to
ghair-mumkin hai ittihad miyan
qaum men intishar dekho to
vasl se aap hi gurezan hon
lazzat-e-intizar dekho to
do hi misron men hai mukammal nazm
vus.at-e-iḳhtiyar dekho to
Leave a Reply