Khalid Akhlaq
ishq ke daur men kuchh aise bhi pahlu aa.e
hansna chaha to miri ankhon men aansu aa.e
ik to vo phuul hi kaghaz ke uTha leta hai
is pe ye zid hai ki in phulon se ḳhushbu aa.e
tu kahan tha ki tujhe DhunDne mere ghar tak
kabhi bhaunre kabhi titli kabhi jugnu aa.e
bas ye hi soch ke har vaqt tujhe yaad kiya
apni yadon ke ta.aqub men kabhi to aa.e
mera sabr aur tire zulm-o-sitam tol sake
kaash ijad men aisa bhi tarazu aa.e
tu hi us ḳhvab ki ta.abir bata kyon ‘ḳhalid’
jism se mere tire jism ki ḳhushbu aa.e
Leave a Reply