Farrukh Adeel
kabhi to saans tiri yaad se juda nikle
hamari shab ke muqaddar se ratjaga nikle
ajab nahin ki mire baad mera kul tarka
hara-bhara sa bas ik zaḳhm aur diya nikle
bhanvar ne gher liya hai so bach na pa.unga
ye ishq khel nahin hai ki rasta nikle
yahan to bolte rahna bahut zaruri hai
suḳhan ke shahr men gunge kidhar se aa nikle
tumhari aah pe matam-ba-dast hai duniya
hamare dard pe har munh se qahqaha nikle
vo ḳhvab niind ki suuli pe bain karta hai
jo surḳh aankh ki zad se mira hava nikle
hamare chahne valon ko ham se shikva hai
samajh rahe the vo patthar ham a.ina nikle
Leave a Reply