Shah Naseer
nikhat-e-gul hain ya saba hain ham
nahin maalum kuchh ki kya hain ham
ru-shanasi hai ham ko aina-san
ek aalam se ashna hain ham
khaksari se bazm-e-alam men
safha-e-naqsh-e-boriya hain ham
hai hamin se vo shahid-e-maani
harf-e-matlab ke muddaa hain ham
jam-e-mai saqiya shitabi de
kaun kahta hai parsa hain ham
shama-san hai daraz rishta-e-umr
ki fana hone se baqa hain ham
tere kucha talak ki taqat hai
nahin itne shikasta-pa hain ham
bang-e-sankh aur nala-e-naqus
kahe hamdam jo kam-numa hain ham
chashm kya kiije va ba-rang-e-hubab
turfat-ul-ain men hava hain ham
nargisi chashm tha vo kafir aah
jis ke bimar-o-mubtala hain ham
nazninan-e-dahr ke har dam
kushta-e-ghamza-o-ada hain ham
ai vafa tu kidhar hai ho dam-saz
kushta-e-khanjar-e-jafa hain ham
chashm-e-bad-dur kya ghazal hai ‘nasir’
khuub is fan men marhaba hain ham
Leave a Reply