Prem Warbartani
na puchh dil ke ḳharabe se aur kya nikla
baḌi talash ke ba.ad ek naqsh-e-pa nikla
ruke to chand bahut duur tha tasavvur se
chale to chaar hi qadmon ka fasla nikla
ḳhirad ke phuul to murjha ga.e baharon men
junun ka zaḳhm ḳhizan men hara-bhara nikla
siyah raat men lau de uThe lahu ke charagh
rubab-e-ishq se vo shola-e-nava nikla
safar-e-shabab ka had-darja muḳhtasar tha magar
bahut tavil sarabon ka silsila nikla
nigah-e-naz men masti bhi hai taqaddus bhi
sharab-ḳhane ka mandir se rabta nikla
visal-e-yar to qismat ki baat hai be-shak
ḳhayal-e-yar bhi ham se bahut ḳhafa nikla
nigar-e-sher ne sola-singar jis men kiye
vo aa.ina mire ashkon ka a.ina nikla
kamal-e-chashm-e-nazara to dekhiye ai ‘prem’
bayaz-e-jism ka har raaz ḳhushnuma nikla
Leave a Reply