Miyan Chashm-E-Jadu Pe Itna Ghamand

miyan chashm-e-jadu pe itna ghamanD

khat-o-khal o gesu pe itna ghamanD

aji sar utha kar idhar dekhna

isi chashm o abru pe itna ghamanD

nasim-e-gul is zulf men ho to aa

na kar apni khushbu pe itna ghamanD

shab-e-mah men kahta hai vo maah se

rakabi se is ru pe itna ghamanD

bas ai shama kar fikr apni zara

inhi chaar aansu pe itna ghamanD

akadta hai kya dekh dekh aaina

hasin garche hai tu pa itna ghamanD

vo kar panja ‘insha’ se bole ki vaah

isi zor-e-bazu pe itna ghamanD

Leave a Comment