Manish Shukla
aḳhiri koshish bhi kar ke dekhte
phir usi dar se guzar ke dekhte
guftugu ka koi to milta sira
phir use naraz kar ke dekhte
kaash juḌ jaata vo TuuTa aa.ina
ham bhi kuchh din ban sanvar ke dekhte
rah-guzar hi ko Thikana kar liya
kab talak ham ḳhvab ghar ke dekhte
kaash mil jaata kahin sahil koi
ham bhi kashti se utar ke dekhte
ho gaya taari sanvarne ka nasha
varna ḳhvahish thi bikhar ke dekhte
dard hi gar hasil-e-hasti hai to
dard ki had se guzar ke dekhte
Leave a Reply