haath na aai duniya bhi aur ishq men bhi gumnam rahe
soch ke ab sharminda hain kyuun donon men nakam rahe
ab tak us ke dam se apni khush-fahmi to qaaem hai
achchha hai jo baat men is ki thoda sa ibham rahe
ham ne bhi kuchh naam kiya tha ham ko bhi eazaz mile
ishq men ham bhi ik muddat tak morid-e-sad-dushnam rahe
mere paas to apne liye bhi aksar koi vaqt na tha
haan jo faraghat ke lamhe the teri yaad ke naam rahe
vaqif-e-hal to hai vo apna munsif-e-jan-dar sahi
us ke har insaf ka lekin mere sar ilzam rahe
aaj ka din bhi be-masraf si sochon hi men biit gaya
aaj ke din bhi yuun hi pade phir ghar ke saare kaam rahe