apni ḳhabar, na us ka pata hai, ye ishq hai
jo thaa, nahin hai, aur na thaa, hai,, ye ishq hai
pahle jo thaa, vo sirf tumhari talash thi
lekin jo tum se mil ke hua hai, ye ishq hai
tashkik hai, na jang hai mabain-e-aql-o-dil
bas ye yaqin hai ki ḳhuda hai, ye ishq hai
behad ḳhushi hai, aur hai be-intiha sukun
ab dard hai, na gham, na gila hai, ye ishq hai
kya ramz janni hai tujhe asl-e-ishq kii?
jo tujh men us badan ke siva hai, ye ishq hai
shohrat se teri ḳhush jo bahut hai, ye hai ḳhirad
aur ye jo tujh men tujh se ḳhafa hai, ye ishq hai
zer-e-qaba jo husn hai, vo husn hai ḳhuda
band-e-qaba jo khol raha hai, ye ishq hai
idrak ki kami hai samajhna ise maraz
is ki duaa, na is ki dava hai, ye ishq hai
shaffaf o saaf, aur latafat men be-misal
saara vajud a.ina sa hai, ye ishq hai
ya.ani ki kuchh bhi is ke siva sujhta nahin?
haan to janab, mas.ala kya hai? ye ishq hai
jo aql se badan ko mili thii, vo thi havas
jo ruuh ko junun se mila hai, ye ishq hai
is men nahin hai daḳhl koi ḳhauf o hirs ka
is ki jaza, na is ki saza hai, ye ishq hai
sajde men hai jo mahv-e-dua vo hai be-dili
ye jo dhamal Daal raha hai, ye ishq hai
hota agar kuchh aur to hota ana-parast
us ki raza shikast-e-ana hai, ye ishq hai
‘irfan’ manne men ta.ammul tujhe hi tha
main ne to ye hamesha kaha hai, ye ishq hai
Leave a Reply