Devmani Pandey
kuchh yuun safar ke shauq ne manzar dikha.e hain
manzil ke paas aa ke qadam laḌkhaḌa.e hain
duniya ke dukh tumhare sitam doston ke gham
kis kis ko ham bata.en ki kis ke sata.e hain
aa.e hain ishq men kabhi aise maqam bhi
ankhen thiin ashk-bar to lab muskura.e hain
akasr laga hai sach bhi mira jhuuT aap ko
par sach yahi hai main ne bahut zaḳhm khaa.e hain
aisa laga ki jaag uThe pattharon men sar
jab bhi tumhare honT kabhi gunguna.e hain
Leave a Reply