Mere Atraf Ye Kaisi Sadaen Raqs Karti Hain

Shamim Ravish

mire atraf ye kaisi sada.en raqs karti hain

ki yuun lagta hai mujh men apsara.en raqs karti hain

isi ummid par shayad kabhi ḳhushbu koi utre

miri yadon ke angan men hava.en raqs karti hain

mayassar hi nahin aati mujhe ik pal bhi tanha.i

ki mujh men ḳhvahishon ki ḳhadma.en raqs karti hain

mujhe har shaam ik sunsan jangal khinch leta hai

aur is ke ba.ad phir ḳhuni bala.en raqs karti hain

kabhi dekha hai tum ne shaam ka manzar jab ankhon men

sitare TuTte hain aur ghaTa.en raqs karti hain

kisi ki chaah men koi ‘ravish’ jab jaan deta hai

zamin se asman tak atma.en raqs karti hain