dil bahak jaata hai barsat ke saath
ham bigaḌ jaate hain halat ke saath
vo muqaddas hai sahife ki tarah
hifz ho jaata hai ayat ke saath
kitne raushan hain dar-o-bam-e-ḳhayal
ham chamakne lage zarrat ke saath
dasht-e-jan aur tire dard ki lau
kaun guzra hai miri raat ke saath
ye ghanimat hai ki ham zinda hain
log mar jaate hain adat ke saath
koi tadbir falak ki na chali
ham javan ho ga.e afat ke saath
maslahat sach nahin kahne deti
log bikte hain karamat ke saath
ek raghbat hai mai-e-nab se ‘qais’
ik ta.alluq hai ḳharabat ke saath
Leave a Reply