har shikan vaqt ki peshani pe rakhi hui hai
ham ne yuun zindagi asani pe rakhi hui hai
kuchh bhi kah lijiye buniyad hai aḳhir buniyad
kya hua gar ye zamin paani pe rakhi hui hai
guftugu kaise karen ahl-e-ḳhirad se ki vahan
apni har baat hi nadani pe rakhi hui hai
tum ne samjha hai to bas itna hamen ki ham ne
zindagi yuun hi pareshani pe rakhi hui hai
apni pahchan to bas ye hai ki pahchan apni
ham ne ajdad ki sultani pe rakhi hui hai
haa.e ki jins-e-giran bhi hai lahu insan ka
aur yahi shai hai ki arzani pe rakhi hui hai
ek muddat se hai dilli men obaidurrahman
ye nazar ab bhi ki hairani pe rakhi hui hai
Leave a Reply