Poet
nigah-e-shauq ko ruḳh par nisar hone do
ye rang la.egi kya kya bahar hone do
rahin-e-jazba-e-be-iḳhtiyar hone do
jo ho raha hai koi be-qarar hone do
dil-e-hazin ko mire jalva-zar hone do
ḳhizan-nasib chaman men bahar hone do
dil-e-firaq-zada men qarar hone do
dam-e-ajal to nigahon ko chaar hone do
karishme dekhna mar mar ke jiine valon ke
tum apne kuche men mera mazar hone do
tum apne va.adon ki iifa karo umiid nahin
jahan men husn ko be-e’tibar hone do
shab-e-firaq men lo chal basa tumhara ‘taj’
qayam-e-hashr tak ab intizar hone do
Leave a Reply