jab se ik chand ki chahat men sitara hua huun
shahr-e-shab-zad ki ankhon ka sahara hua huun
ai mire dard ke dariya ki ravani mujhe dekh
main tire qurb se kat kat ke kinara hua huun
zindagi! tujh sa munafiq bhi koi kya hoga
tera shahkar huun aur tera hi maara hua huun
bujh gae jab mire sab khvab o charagh o mahtab
shahr-e-zulmat ko main tab ja ke gavara hua huun
samne phir mire apne hain so main janta huun
jiit bhi jaun to ye jang main haara hua huun
zakhm ginta huun shab-e-hijr men aur sochta huun
main to apna bhi na tha kaise tumhara hua huun
main payambar huun na ho sakta huun phir bhi ‘ahmad’
aisa lagta hai sar-e-khak utara hua huun
Leave a Reply