Sufi

Sanson Ko De Ke Tohfa-e-Nikhat Guzar Gai

sanson ko de ke tohfa-e-nik.hat guzar gai

chhu kar mujhe hava-e-mohabbat guzar gai

ankhon men e’tibar ka mausam basa raha

mujh ko fareb de ke vo surat guzar gai

mahsus kar raha huun use har nafas ke saath

vo jis ke intizar men muddat guzar gai

ankhon men ek karb sa lahra ke rah gaya

nazron se jab bhi teri shabahat guzar gai

vaqt aa pada zamir-faroshi ka gar kabhi

daman bacha ke meri zarurat guzar gai

‘abid’ mire liye to qayamat se kam na thi

kahne ko us ke hijr ki saaat guzar gai

More Poems

Leave a Comment