tiri thaki hui a.ankhon men ḳhvab tha ki nahin
mire saval ka koi javab tha ki nahin
uTha ke sirf babulon ke ḳhaar le aa.e
chaman chaman kahin taaza gulab tha ki nahin
baḌe sukun se rahe mom ke badan vaale
tumhara shahr tah-e-aftab tha ki nahin
har ek shaḳhs vahan gin raha tha lahron ko
guzarte lamhon ka koi hisab tha ki nahin
sarab tishna-labi dhuup abla-pa.i
ḳhayal pichhle safar ka azaab tha ki nahin
har ek samt udasi ka rang tha ‘shahid’
vo jalva-saz kabhi be-hijab tha ki nahin
Leave a Reply