Daniyal Tareer
jaras aur sarbanon tak pahunchna chahta hai
ye dil agle zamanon tak pahunchna chahta hai
jununi ho gaya hai mere dariyaon ka paani
pahaḌon ke gharanon tak pahunchna chahta hai
guzarna chahti hai badalon se meri hairat
mira shak asmanon tak pahunchna chahta hai
patanga ek pagal ho gaya hai raushni men
farishton ki uḌanon tak pahunchna chahta hai
kasafat ḳhatm kar ke jism ki miTTi ka putla
ḳhuda ke kar-ḳhanon tak pahunchna chahta hai
nahin aaya ye azhdar parbaton ki sair karne
zaminon ke ḳhazanon tak pahunchna chahta hai
darinde saath rahna chahte hain aadmi ke
ghana jangal makanon tak pahunchna chahta hai
Leave a Reply