be-ravi o zulf-e-yar hai rone se kaam yaan
daman hai munh pe abr-e-namat subh-o-sham yaan
avaza hi jahan men hamara suna karo
anqa ke taur ziist hai apni ba-nam yaan
vasf-e-dahan se us ke na aage qalam chale
yaani kya hai khame ne khatm kalam yaan
ghalib ye hai ki mausam-e-khat vaan qarib hai
aane laga hai muttasil us ka payam yaan
mat kha fareb-e-ijz azizan-e-hal ka
pinhan kiye hain khaak men yaron ne daam yaan
koi hua na dast-basar shahr-e-husn men
shayad nahin hai rasm-e-javab salam yaan
nakam rahne hi ka tumhen gham hai aaj ‘mir’
bahuton ke kaam ho gae hain kul tamam yaan