abdul-aziz-fitrat

Kuchh Aisa Tha Gumrahi Ka Saya

kuchh aisa tha gumrahi ka saaya

apna hi pata na ham ne paaya

dil kis ke jamal men hua gum

aksar ye khayal hi na aaya

ham to tire zikr ka hue juzv

tu ne hamen kis tarah bhulaya

ai dost tiri nazar se mera

aivan-e-nigah jag muskaya

khurshed usi ko ham ne jaana

jo zarra zamin pe muskuraya

maqsud thi tazgi chaman ki

ham ne rag-e-jan se khuun bahaya

uftad hai sab ki apni apni

kis ne hai kisi ka gham bataya

marumi-e-javedan hai aur main

main zauq-e-talab se baaz aaya

har gham pe hai mere naam ki mahr

‘fitrat’ koi gham nahin paraya

More Poems

Leave a Comment