Kahna Hi Mera Kya Hai Ki Main Kuchh Nahin Kahta

kahna hi mira kya hai ki main kuchh nahin kahta

ye bhi tumhen dhoka hai ki main kuchh nahin kahta

ye baat ki kahna hai mujhe tum se bahut kuchh

is baat se paida hai ki main kuchh nahin kahta

apni hi kahe jaata hai ai naseh-e-na-faham

tu kuchh nahin sunta hai ki main kuchh nahin kahta

rahta hai vo but shikva-e-aghyar pe ḳhamosh

kahta hai to kahta hai ki main kuchh nahin kahta

kahlao na kuchh ghair ki tarif men mujh se

samjho to ye thoḌa hai ki main kuchh nahin kahta

kahne ka to apne hai ‘vafa’ aap bhi qaa.el

kahne ko ye kahta hai ki main kuchh nahin kahta