jab bhi tiri yadon ki chalne lagi purva.i
har zaḳhm hua taaza har choT ubhar aa.i
is baat pe hairan hain sahil ke tamasha.i
ik TuuTi hui kashti har mauj se Takra.i
maiḳhane tak aa pahunchi insaf ki rusva.i
saaqi se hui laghzish rindon ne saza paa.i
hangama hua barpa ik jaam agar TuuTa
dil TuuT ga.e lakhon avaz nahin aa.i
ik raat basar kar len aram se divane
aisa bhi koi va.ada ai jan-e-shakeba.i
kis darja sitam-gar hai ye gardish-e-dauran bhi
ḳhud aaj tamasha hain kal the jo tamasha.i
kya janiye kya gham tha mil kar bhi ye aalam tha
be-ḳhvab rahe vo bhi ham ko bhi na niind aa.i
Leave a Reply