nahin ki dil men hamesha ḳhushi bahut aa.i
kabhi taraste rahe aur kabhi bahut aa.i
mire falak se vo tufan nahin uTha phir se
miri zamin men vo tharthari bahut aa.i
jidhar se khol ke baiThe the dar andhere ka
usi taraf se hamen raushni bahut aa.i
vahan maqam to rone ka tha magar ai dost
tire firaq men ham ko hansi bahut aa.i
ravan rahe safar-e-marg par yunhi varna
hamari raah men ye zindagi bahut aa.i
yahan kuchh apni havaon men bhi uḌe hain bahut
hamare ḳhvab men kuchh vo pari bahut aa.i
na tha ziyada kuchh ehsas jis ke hone ka
chala gaya hai to us ki kami bahut aa.i
na jaane kyuun miri niyyat badal ga.i yak-dam
vagarna us pe tabi.at miri bahut aa.i
‘zafar’ shu.ur to aaya nahin zara bhi hamen
baja.e is ke magar sha.iri bahut aa.i
Leave a Reply