nisf se dekh zara kam na ziyada aadha
baant lete hain mohabbat tujhe aadha aadha
mehrban ishq mujhe kaat diya jaega
hone vaala hai mira dast-e-kushada aadha
chauk men dekhne vaale the tamasha us ka
jis ko ghurbat men mayassar tha labada aadha
mere behis main tujhe milne nahin a.ungi
aaj taqsim hua mera irada aadha
kuza-gar mujh ko bikharna hai bikhar jaane de
meri tajsim men shamil hai burada aadha
teri duniya bhi miri tarah ujad jaegi
rah gaya mujh men agar sabr ka madda aadha
baaqi aadhi to kisi aur ki mutthi men dabi
pusht par main ne tujhe ziist hai laada aadha