ab mujh ko kya khabar vo yahan hai bhi ya nahin
har ik se shahr men to mira rabta nahin
jannat bana to sakte hain is kaenat ko
lekin miri tarah se koi sochta nahin
jis rahguzar pe phuul saje hain mire liye
ai pa-e-shauq ab vo mira rasta nahin
zahir se mutmain hai mire aur ik naqab
chehre pe jo pada hai use dekhta nahin
jab tak thi dil men saans bhi khushbu bani rahi
honton pe aa ke baat men ab kuchh raha nahin
ik vaqt tha ki raah guzarna muhal tha
ab mud ke raste men koi dekhta nahin
ab shaam ho gai hai mujhe sona chahiye
suraj tire khayal ka garche dhala nahin
Leave a Reply