gae manzaron se ye kya uda hai nigah men
koi aks hai ki ghubar sa hai nigah men
hama-vaqt apni shabih ke huun main ru-ba-ru
koi ashk hai ki ye aina hai nigah men
koi shahr-e-khvab guzar raha hai khayal se
koi dasht-e-sham sulag raha hai nigah men
kaf-e-dard se gham-e-kaenat ki gard se
vahi mit raha hai jo naqsh sa hai nigah men
koi tirgi hai furat-e-jan men ravan-davan
magar ik charagh sa tairta hai nigah men
gae mausamon ki vo sabz rang hikayaten
koi ab-e-surkh se likh gaya hai nigah men
Leave a Reply