kaun utra nazar ke ziine se
mahfil-e-dil saji qarine se
shaiḳh-sahib mujhe aqidat hai
gungunate hue mahine se
mai ko gul-rang kar diya kis ne
ḳhuun le kar kali ke siine se
koi sahil na naḳhuda apna
ham to manus hain safine se
kis ka e.ajaz hai ki rindon ko
chain milta hai aag piine se
pi ke jiite hain ji ke piite hain
ham ko raghbat hai aise jiine se
mai ki taqdis ka javab kahan
daagh dhulte hain dil ke piine se
haa.e ‘altaf’ vo urus-e-bahar
jhankti hai jo abgine se
Leave a Reply