kahin se ghair jo pahlu men aa.e baiThe hain
isi liye vo hamen yuun bhula.e baiThe hain
zara samajh ke karo ham se apne gham ka bayan
ham ek umr ke sadme uTha.e baiThe hain
kabhi ḳhayal men apne mujhe nahin laa.e
vo muddaton se mire dil men aa.e baiThe hain
kahan se loge vo surat vo kam-sini ka jamal
ham apne gosha-e-dil men chhupa.e baiThe hain
ḳhuda ka shukr hai un ko ḳhayal to aaya
ki vo kisi ki nazar men sama.e baiThe hain
dhara hi kya hai mohabbat men be-kasi ke siva
ham apne aap muqaddar bana.e baiThe hain
nigah-e-naz ke talib hain rahguzar men tiri
isi firaq men dhuni rama.e baiThe hain
kisi ko dekh liya tha kahin pe nadan ne
tabhi se ḳhud ko ye hazrat lubha.e baiThe hain
Leave a Reply