Dilshad Naseem
jagte rahna hai ab ḳhvab ki ta.abir talak
dard sahna hai ye tiryak ki tasir talak
is men saaya koi ban jaa.e to aa jaana tum
ham yahin baiThenge divar ki ta.amir talak
aap ke saath bas ik shaam bitane ke liye
daav pe dil ki laga Daali hai jagir talak
asman par jo sitaron ki thi mahfil is men
ham ne dekhi thi numayan tiri tasvir talak
aaj ‘dilshad’ ne phir ek ghazal likh Daali
silsila ja.ega ‘ghalib’ se kabhi ‘mir’ talak
Leave a Reply