Gham-E-Dil Ko Zamane Se Chhupana Bhi Nahin Aata

Waqas Yusuf

gham-e-dil ko zamane se chhupana bhi nahin aata

hamen to Thiik se aansu bahana bhi nahin aata

saja kar kis tarah rakkhi hain kamre men tiri yaden

agarche Thiik se ham ko sajana bhi nahin aata

rahunga kis tarah ḳhvahish ki basti men akela main

karunga kya mujhe paisa kamana bhi nahin aata

banenge kya shikari ham tumhare samne janan

lagana ham ko tere sa nishana bhi nahin aata

sitam-gar aḳhiri didar kar lo ham chale jaa.en

yaqin apni vafaon ka dilana bhi nahin aata

mohabbat ko bhala kaise samajh paogi tum nadan

tumhen to Thiik se milna milana bhi nahin aata

chalo ab toḌ Daalo aḳhiri rishta bhi ham se tum

ye kah kar saath ‘yusuf’ ko nibhana bhi nahin aata