teri be-iltifati kya koi kam hoti jaati hai
tabi.at rafta rafta ḳhugar-e-gham hoti jaati hai
hazaron chara-gar hain aur gham baḌhte hi jaate hain
jo surat dekhiye tasvir-e-matam hoti jaati hai
tasalli aap ne di farq hai haan dil ki halat men
jo tham tham kar ḳhalish hoti thi paiham hoti jaati hai
jo chingari thi pahle ab vo bijli ban ga.i baḌh kar
mohabbat umr Dhal jaane se kya kam hoti jaati hai
nazar kya aap ki badli mizaj-e-zindagi badla
jo pahle jan-faza thi mai vahi kam hoti jaati hai
kisi ka gham samo.e jaata hai rag rag men rang aise
ki apni zindagi husn-e-mujassam hoti jaati hai
na ehsas-e-gham-e-janan na ehsas-e-gham-e-dauran
to kyuun manus-e-girya chashm-e-pur-nam hoti jaati hai
sab ulTi paḌ rahi hain shayad azadi ki tadbiren
ki zanjir-e-mohabbat aur mohkam hoti jaati hai
‘jigar’ kya taab la sakta hai koi dil men zaḳhmon ki
magar kuchh ghaib se tadbir-e-marham hoti jaati hai
Leave a Reply