mohabbaten thiin kuchh aisi visal ho ke raha
vo ḳhush-ḳhayal mira ham-ḳhayal ho ke raha
har ek parde men daryaft us ka husn kiya
phir us ḳhazane se main mala-mal ho ke raha
lahu ki lahr men shadabiyon ki shiddat se
mizaj us ka mire hasb-e-hal ho ke raha
karam ka silsila jo munqat.a tha ghaflat se
bahal kaise na hota bahal ho ke raha
ham itna chahte the ek dusre ko ‘zafar’
main us ki aur vo meri misal ho ke raha
Leave a Reply