Ye Silsila-E-Sham-O-Sahar Yunhi Nahin Hai

ye silsila-e-sham-o-sahar yunhi nahin hai

har qafila sargarm-e-safar yunhi nahin hai

hangame bapa karti hai har aan tiri yaad

pur-shor dil-o-jan ka nagar yunhi nahin hai

tariḳh suna sakti hai sadiyon ke safar ki

ye gard sar-e-rahguzar yunhi nahin hai

ubhrega yaqinan koi dam men koi suraj

betabi-e-arbab-e-nazar yunhi nahin hai

manzil bhi koi ḳhaas milegi hamen ‘ruhi’

dushvar se dushvar safar yunhi nahin hai