Nafas Ambalvi
yuun nahin tha ki tirgi kam thi
dhuup se apni dosti kam thi
ḳhvahishon ke hujum the lekin
apne hisse men zindagi kam thi
tum na aa.e to bas hua itna
kal charaghon men raushni kam thi
haan vo hans kar nahin mila phir bhi
us ki baton men be-ruḳhi kam thi
gham use bhi na tha bichhaḌne ka
meri ankhon men bhi nami kam thi
kuchh taghaful-mizaj tha saaqi
aur kuchh apni pyaas bhi kam thi
us ka lahja to ḳhuub tha lekin
us ke sheron men sha.iri kam thi
kyuun mujhe de gaya vo sannaTe
kya mire ghar men ḳhamushi kam thi
Leave a Reply