Peer Akram
shishe ki divar thi haa.il qurb ki aisi surat thi
kuchh apni bhi majburi thi kuchh us ki bhi zarurat thi
sathi aur kisi ka mera ham-zauq-o-ham-rang-esuḳhan
us ki tanha.i ko shayad kuchh meri bhi zarurat thi
pahli nazar ne kitni hairat se us shakl ko dekha tha
meri soch ki tasviron se milti-julti murat thi
zard hava ka andha jhonka naqsh miTa kar guzar gaya
ret pe ab bikhre harfon ki ik be-chehra surat thi
jis ki baten shahd se miThi jis ke haath men surḳh gulab
us ki soch men zahr bhara tha us ke dil men kudurat thi
ye kis ke e.azaz men ‘akram’ maqtal men hai jashn bapa
aaj salibon ki is nagri men ye kis ki surat thi
Leave a Reply