Hanif Fauq
dil-e-nadan pe shikayat ka guman kya hoga
chand ashkon se jafaon ka bayan kya hoga
shab ke bhaTke hue raahi ko ḳhabar de koi
sub.h-e-rangin ki baharon ka nishan kya hoga
nala-e-murgh-e-giraftar se be-zari kya
gosh-e-sayyad pe ab ye bhi garan kya hoga
sach ke kahne se agar ji ka ziyan hota hai
sach bahar-hal hai sach mohr-e-dahan kya hoga
chup rahen ham to sar-e-dar pukarega lahu
chand hi roz men a.in-e-jahan kya hoga
zarre zarre pe koi phunkega afsun-e-bahar
mana-e-josh-e-numu jaur-e-ḳhizan kya hoga
chashm-e-nargis ko havas hai ki chaman men dekhe
atish-e-gul ke bhaḌakne ka saman kya hoga
ab to ham shahr-e-nigaran se chale aa.e hain
ba.is-e-vahshat-e-dil husn-e-butan kya hoga
Leave a Reply