Alam Khursheed
kahin pe jism kahin par ḳhayal rahta hai
mohabbaton men kahan e’tidal rahta hai
falak pe chand nikalta hai aur dariya men
bala ka shor ghazab ka ubaal rahta hai
dayar-e-dil men bhi abad hai koi sahra
yahan bhi vajd men raqsan ghazal rahta hai
chhupa hai koi fusun-gar sarab ankhon men
kahin bhi jaao usi ka jamal rahta hai
tamam hota nahin ishq-e-na-tamam kabhi
koi bhi umr ho ye la-zaval rahta hai
visal-e-jism ki surat nikal to aati hai
dilon men hijr ka mausam bahal rahta hai
ḳhushi ke laakh vasa.el ḳharid lo ‘alam’
dil-e-shikasta magar pur-malal rahta hai
Leave a Reply