Zafar Iqbal
khiḌkiyan kis tarah ki hain aur dar kaisa hai vo
sochta huun jis men vo rahta hai ghar kaisa hai vo
kaisi vo ab-o-hava hai jis men vo leta hai saans
aata jaata hai vo jis par rahguzar kaisa hai vo
kaun si rangat ke hain us ke zamin-o-asman
chhanv hai jis ki yahan tak bhi shajar kaisa hai vo
ik nazar men hi nazar aa ja.ega vo sar-ba-sar
phir bhi us ko dekhna bar-e-digar kaisa hai vo
main to us ke ek ik lamhe ka rakhta huun shumar
aur mere hal-e-dil se be-ḳhabar kaisa hai vo
us ka hona hi bahut hai vo kahin hai to sahi
kya sarokar is se hai mujh ko ‘zafar’ kaisa hai vo
Leave a Reply