Sufi

Khayal-e-Pursish-e-Farda Se Ghabrana Nahin Aata

khayal-e-pursish-e-farda se ghabrana nahin aata

gunah karta huun lekin mujh ko pachhtana nahin aata

yaqin-e-daava-e-ulfat nahin maana nahin aata

magar ye bhi to hai jhuton ko jhutlana nahin aata

tabiat hai ghayur aisi ki tishna-kam rahta huun

lagi-lipti kisi ki sun ke pi jaana nahin aata

miri nakamiyan dil ka chaman shadab rakhti hain

ye vo kaliyan hain jin ko khil ke murjhana nahin aata

kisi ke vada-e-batil se taskin ho nahin sakti

khilaune de ke mujh ko dil ka bahlana nahin aata

vafa ki dastan duniya men ‘kaifi’ kab nahin chhidti

zaban-e-khalq par kab mera afsana nahin aata

More Poems

Leave a Comment